ಗುಸು ಗುಸು ಪಿಸು ಪಿಸು ಮಾತು, ಕೆಲವೊಮ್ಮೆ ಬರೀ ಅಬ್‌ಸ್ಟ್ರಾಕ್ಟ್ ಎನ್ನಿಸುವ ಸಂಭಾಷಣೆಗಳು. ಸಾಂಸ್ಕೃತಿಕ ಪರಿಭಾಷೆಯ ಹಾವಳಿ. ಭಾರತೀಯರಿಗೆ ಅಶ್ಲೀಲ ಎನ್ನಿಸುವ ದೃಶ್ಯಗಳು. ಕಲ್ಪನೆಗೂ ಮೀರಿದ ನಾಟಕೀಯ ಸನ್ನಿವೇಶಗಳು. ಒಂದೂವರೆ ತಾಸಿನಲ್ಲೇ ಎಲ್ಲವನ್ನೂ ಹೇಳುವ ತವಕ. ಕಿವಿ ಗಡಚಿಕ್ಕುವಂಥ ಶಬ್ದಮಾಲೆ. ಕ್ರೌರ್ಯದ ವಾಸ್ತವದರ್ಶನ. ವಾಸ್ತವವನ್ನು ಮತ್ತಷ್ಟು ಸಾಂದ್ರವಾಗಿಸುವ ನಟನೆ. ಸಿನೆಮಾದಲ್ಲಿ ಇಲ್ಲದ ಹಾಡು, ಟ್ಯೂನ್ ಮಾರುಕಟ್ಟೆಗೆ ಬಂದ ಆಲ್ಬಮ್‌ನಲ್ಲಿ ಪ್ರತ್ಯಕ್ಷ…. 
`ಭಾರತೀಯ ಸಿನೆಮಾ’ದ ವೀಕ್ಷಕರಿಗೆ (ಸಿನೆಮಾದ ಭಾರತೀಯ ವೀಕ್ಷಕರಲ್ಲ, ಗಮನಿಸಿ!) ಇವೆಲ್ಲ ವಿಚಿತ್ರ ಎನ್ನಿಸಬಹುದು. ಹಾಲಿವುಡ್ ಸಿನೆಮಾದ ಗಮ್ಮತ್ತೇ ಹಾಗೆ. ನೀವು ಅಡಿಕ್ಟ್ ಆದಹಾಗೆಲ್ಲ ಒಂದೇ ಸಿನೆಮಾದ ಎರಡು, ಮೂರು, ನಾಲ್ಕನೇ ಕಂತುಗಳೂ ಬರುವುದಿದೆ. ಅಥವಾ ಒಂದೇ ಥರದ ಕಥೆ ಬೇರೆ ರೂಪದಲ್ಲಿ ಅವತರಿಸುವುದಿದೆ. ಅತ್ತ ಆರ್ಟ್ ಸಿನೆಮಾ ಎಂದೂ ಕರೆಯಬಹುದಾದಷ್ಟು ಉತ್ತಮ ಸರಕು ಹೊಂದಿದ್ದರೂ ಕಮರ್ಶಿಯಲ್ ಸಿನೆಮಾವಾಗಿ ಯಶ ಪಡೆದ ಹಾಲಿವುಡ್ ಸಿನೆಮಾಗಳಿಗೆ ಲೆಕ್ಕವಿಲ್ಲ. ಹಾಲಿವುಡ್ಡೇತರ ಸಿನೆಮಾಗಳು ಕೂಡಾ ಅಂಥದ್ದೇ ಪ್ಲಾಟ್ ಹೊಂದಿರುತ್ತವೆ. ಹೀಗಿದ್ದೂ ಹಾಲಿವುಡ್ ಸಿನೆಮಾ ನೋಡುವುದೇ ಒಂದು ಕಲ್ಟ್ ಆಗುತ್ತೆ; ಆಗಬೇಕು.
ಯಾಕೆ?
ಹಾಲಿವುಡ್ ಸಿನೆಮಾಗಳಲ್ಲಿ ಇರುವ ಬಗೆಯನ್ನೇ ಒಮ್ಮೆ ನೋಡಿ : ಆಕ್ಷನ್ (ಮೊದಲಿನಿಂದ ಕೊನೇವವರೆಗೂ ಚಕಚಕನೆ ನಡೆಯುವ ಘಟನೆಗಳು, ವಿದ್ಯಮಾನಗಳು, ಬದಲಾಗುವ ಸನ್ನಿವೇಶಗಳು), ಅಡ್ವೆಂಚರ್ ( ಸಾಹಸಮಯ ಸನ್ನಿವೇಶಗಳು), ಅನಿಮೇಶನ್ (ಚಿತ್ರಸರಣಿಯಲ್ಲಿ ಹೇಳುವ ಕಥೆಗಳು, ಇವು ಎರಡು ಅಥವಾ ಮೂರು ಆಯಾಮಗಳ ಸಿನೆಮಾಗಳು), ಬಯಾಗ್ರಫಿ (ಜೀವನಚರಿತ್ರೆ), ಕಾಮೆಡಿ (ಹಾಸ್ಯ,- ಇದರಲ್ಲಿ ತೆಳು ಸೆಕ್ಸ್ ಇರುವುದು ಸಾಮಾನ್ಯ), ಕ್ರೈಮ್ (ಕೊಲೆ, ಷಡ್ಯಂತ್ರ, ಅಪರಾಧಿ ಪಾತ್ರಗಳು), ಡಾಕ್ಯುಮೆಂಟರಿ (ಸಾಕ್ಷ್ಯಚಿತ್ರಗಳು), ಡ್ರಾಮಾ ( ನಾಟಕೀಯ ಸನ್ನಿವೇಶಗಳಲ್ಲೇ ಹೆಣೆದ ಚಿತ್ರಕಥೆ), ಫ್ಯಾಂಟಸಿ (ಕಲ್ಪನೆಯೇ ಕಥೆಯಾಗುವ ಸಿನೆಮಾಗಳು), ಹಿಸ್ಟರಿ (ಇತಿಹಾಸದ ಘಟನೆಗಳ ಮರುನಿರ್ಮಾಣ), ಹಾರರ್ (ಭೂತ,ಪ್ರೇತ, ಮಾನಸಿಕ ರೋಗಿಯ ಸರಣಿ ಕಒಲೆ ಇತ್ಯಾದಿ), ಮ್ಯೂಸಿಕ್ (ಸಂಗೀತಮಯ ಕಥಾ ಹಂದರ), ಮಿಸ್ಟರಿ (ರಹಸ್ಯ, ನಿಗೂಢತೆಯ ಕಥೆಗಳು), ರೋಮಾನ್ಸ್ (ಪ್ರೀತಿ, ಪ್ರೇಮ, ಪ್ರಣಯದ ಕಥೆಗಳು), ಸೈ ಫೈ (ವಿಜ್ಞಾನದ ಕಾಲ್ಪನಿಕ ಕಥೆಗಳು), ಸ್ಪೋರ್ಟ್ (ಕ್ರೀಡಾ ಕಥೆಗಳ ಚಿತ್ರಗಳು), ಥ್ರಿಲ್ಲರ್ (ಮೈ ನವಿರೇಳಿಸುವ, ಕುರ್ಚಿಯ ತುದಿಗೆ ತಂದು ಕೂರಿಸುವ, ಮುಂದೆ ಏನಾದೀತೋ ಎಂದು ಬೆಚ್ಚಿ ಬೀಳಿಸುವ ಕಥೆಗಳು)……….
ಜೇಮ್ಸ್ ಕ್ಯಾಮೆರಾನ್ ರೂಪಿಸಿ, ನಿರ್ದೇಶಿಸಿದ `ಅವತಾರ್’ ಸಿನೆಮಾವನ್ನೇ ಗಮನಿಸೋಣ. ಇದು ಅಪ್ಪಟ ಕಾಲ್ಪನಿಕ ಕಥೆ. ಮುಂದೊಂದು ದಿನ ಭೂಮಿಯ ಮನುಷ್ಯರು ಇನ್ನೊಂದು ಗ್ರಹದ ಇಂಧನಕ್ಕಾಗಿ ಮುಗಿಬೀಳುವ ಈ ಕಥಾಹಂದರ ಸಂಪೂರ್ಣ ಕಾಲ್ಪನಿಕ. ಆದರೆ ಇಂಧನಕ್ಕಾಗಿ ಮನುಷ್ಯರು ಮುಂದೊಂದು ದಿನ ಪಡಬೇಕಾದ ಪಾಡಿನ ನೈಜ ಚಿತ್ರಣವೂ ಆಗಿರಬಹುದು! ದಶಕಗಳ ಹಿಂದೆ ಬಂದ ಮೆಲ್ ಗಿಬ್ಸನ್ ಅದ್ಭುತ ನಟನೆಯ `ಮ್ಯಾಡ್ ಮ್ಯಾಕ್ಸ್’ ಕೂಡಾ ಇಂಥದ್ದೇ ಇಂಧನ ಸಮಸ್ಯೆಯನ್ನು ಕಲ್ಪಿಸಿಕೊಂಡು ಮಾಡಿದ ಸೈ ಫೈ ಸಿನೆಮಾ.
`ಅವತಾರ್’ನ ಕಥೆ ಇಲ್ಲಿಗೇ ಮುಗಿಯೋದಿಲ್ಲ. ಇದು ತ್ರೀ ಡಿ ಸಿನೆಮಾ. ಮೂರು ಆಯಾಮಗಳಲ್ಲಿ ನಿಮ್ಮ ಬೆರಳಿಗೆ, ತುಟಿಗೆ ತಾಗಿಯೇ ಬಿಟ್ಟಿತು ಎಂಬ ನೈಜ ಅನುಭವ ಕೊಡುವ ಸಿನೆಮಾ. ಆ ಕತ್ತಲಿನಲ್ಲಿ ಒಂದು ಮರದ ಬೀಜದ ಹೂವು ನಿಮ್ಮ ಕಣ್ಣಮುಂದೆಯೇ ಲಾಸ್ಯವಾಡಿದಾಗ ನೀವೆಷ್ಟು ಖುಷಿಪಡುತ್ತೀರ…. ಈ ಸಿನೆಮಾ ಥ್ರಿಲ್ಲರ್ ಕೂಡಾ ಆಗುತ್ತದೆ. ಕ್ಷಣಕ್ಷಣಕ್ಕೂ ನಿಮ್ಮನ್ನು ಅಚ್ಚರಿಗೆ ತಳ್ಳುವ ಸನ್ನಿವೇಶಗಳು ಇಲ್ಲಿ ಬೇಕಾದಷ್ಟಿವೆ. ರೋಮ್ಯಾನ್ಸ್? ಅದೂ ಇದೆ ಬಿಡಿ. ಹಾರರ್? ಇಲ್ಲ. ಫ್ಯಾಂಟಸಿ ? ಬೇಕಾದಷ್ಟಿದೆ.
ಅಂದರೆ ಗೊತ್ತಾಯ್ತಲ್ಲ? ಒಂದು ಹಾಲಿವುಡ್ ಸಿನೆಮಾ ಹಲವಾರು ಬಗೆಗಳನ್ನೂ ಏಕೀಕರಣ ಮಾಡಿಕೊಳ್ಳುವ ಸಾಮರ್ಥ್ಯ ಪಡೆದಿದೆ. ಕ್ಯಾಮೆರಾನ್‌ನ ಮಾಜಿ ಹೆಂಡತಿ ಕ್ಯಾಥರೀನ್ ಬಿಗೆಲೋ ನಿರ್ದೇಶಿಸಿದ ಸಿನೆಮಾ `ದಿ ಹರ್ಟ್ ಲಾಕರ್’ ನೋಡಿ. ಇದು ಇರಾಖ್ ಆಕ್ರಮಣದ ಇತಿಹಾಸವನ್ನೇ ಮರುಸೃಜಿಸಿದ, ಕ್ಷಣಕ್ಷಣಕ್ಕೂ ನಿಮ್ಮನ್ನು ಕುತೂಹಲದ ಪ್ರಪಾತಕ್ಕೆ ತಳ್ಳುವ ನೈಜ ಘಟನೆಗಳ, ನೈಜ ಸನ್ನಿವೇಶದಂತೇ ಕಾಣುವ ದೃಶ್ಯಗಳ ಸಿನೆಮಾ. ಈ ಸಿನೆಮಾದಲ್ಲಿ ಎಲ್ಲೂ ಕಾಲ್ಪನಿಕ ವಸ್ತುಗಳಿಲ್ಲ; ನೀವು ಇರಾಖ್ ಬಗ್ಗೆ ಓದಿರುವ ಎಲ್ಲ ಸ್ಫೋಟಕ ಸುದ್ದಿಗಳೂ ಇಲ್ಲಿ ಕಣ್ಣೆದುರೇ ಘಟಿಸುತ್ತವೆ. ೨೧ನೇ ಶತಮಾನದ ಯುದ್ಧದ ವಾಸ್ತವಿಕತೆಯನ್ನು ನಿಮ್ಮ ಕಣ್ಣಿಗೆ ರಾಚುವಂತೆ ಚಿತ್ರಿಸಿದ ಈ ಸಿನೆಮಾ ಕೂಡಾ `ಅವತಾರ್’ ಜೊತೆಗೆ ಈ ವರ್ಷದ ಒಂಬತ್ತು ವಿಭಾಗಗಳಲ್ಲಿ ಆಸ್ಕರ್ ಪ್ರಶಸ್ತಿಗಳಿಗೆ ನಾಮಕರಣವಾಗಿದೆ. (ಈ ಲೇಖನ ಪ್ರಕಟವಾಗೋ ಹೊತ್ತಿಗೆ ಆಸ್ಕರ್ ಪ್ರಶಸ್ತಿಗಳು ಪ್ರಕಟವಾಗಿರುತ್ತವೆ).
ಹಾಲಿವುಡ್ ಸಿನೆಮಾಗಳನ್ನು ನೀವು ಯಾವಾಗಲೂ ನೋಡಬೇಕು. ವರ್ತಮಾನದಲ್ಲಿ ನಡೆಯೋ ವಿದ್ಯಮಾನಗಳಲ್ಲಿ ನಾವು ಕಾಣಬೇಕಾದ ಮಾನವೀಯ ಸಂದರ್ಭಗಳನ್ನು ತಿಳಿಯಲು; ಕನಸುಗಳಲ್ಲಿ ಕಾಣುವ ಕಲ್ಪನೆಗಳನ್ನು ಸಾಕಾರ ಮಾಡಿಕೊಳ್ಳಲು; ಮನುಷ್ಯ ಸಂಬಂಧಗಳ ತೀವ್ರತೆಯನ್ನು ಮನಸಾರೆ ಅನುಭವಿಸಲು. ವಿಶ್ವದ ಸಮಸ್ಯೆಗಳಿಗೆ ಹಿಂಸೆಯೇ ಪರಿಹಾರವಲ್ಲ; ಯುದ್ಧವೇ ಉತ್ತರವಲ್ಲ ಎಂದು ಸಾರಲು; ಹಸುವಿನಂಥ ಮುಖ ಹೊತ್ತವರೂ ಹಿಂಸಾಚಾರಕ್ಕೆ ಎಳಸಬಹುದು- ಆದರೆ ಅವರ ಕ್ರೌರ್ಯಕ್ಕೆ ಸದಾ ಕೊನೆ ಇರುತ್ತದೆ ಎಂಬ ಸತ್ಯವನ್ನು ಮನವರಿಕೆ ಮಾಡಿಕೊಳ್ಳಲು; ಒಂದೂವರೆ – ಎರಡು ತಾಸಿನಲ್ಲೇ ಒಂದು ವಿಷಯದ ಬಗ್ಗೆ ನಾವೂ ಒಂದು ಗಟ್ಟಿ ನಿರ್ಧಾರ ತಾಳಲು; ಅಥವಾ ನಮ್ಮ ಎಲ್ಲ ಜಂಜಡಗಳನ್ನು ಮರೆತು ಒಂದಷ್ಟು ಕಾಲ ಹೊಸ ದೃಶ್ಯಗಳನ್ನೇ ಅನುಭವಿಸುತ್ತ ನಮ್ಮ ಮನಸ್ಸನ್ನು ತಿಳಿಗೊಳಿಸಲು; ಈ ಮನುಕುಲವು ಹಿಂಸೆ, ಪ್ರೀತಿ, ಕ್ರೌರ್ಯ, ಯುದ್ಧ, ಸಂಬಂಧ, ವಿಜ್ಞಾನ, ಕಲೆ, ಇತಿಹಾಸ – ಎಲ್ಲವನ್ನೂ ಈ ಭೂಮಿಯಲ್ಲಿ ಎಸಗಿದ ಬಗ್ಗೆ ನಮ್ಮದೇ ಹೊಸ ವ್ಯಾಖ್ಯಾನಕ್ಕೆ ಬರಲು……..
ಒಳ್ಳೆಯ ಹಾಲಿವುಡ್ ಸಿನೆಮಾಗಳ ಸಾಮಾನ್ಯ ಗುಣಗಳು ಹೀಗಿರುತ್ತವೆ: ಸಿನೆಮಾದ ಉದ್ದಕ್ಕೂ ಶಬ್ದದ ಬಳಕೆ ಸಮರ್ಥವಾಗಿರುತ್ತದೆ. ನಡೆಯುವ ಶಬ್ದವಷ್ಟೇ ಅಲ್ಲ, ಹೆಲ್ಮೆಟ್ ಒಳಗೆ ಉಸಿರಾಡುವ ಶಬ್ದವೂ ಹಾಗೇ ಕೇಳುತ್ತದೆ. ವಾಶ್ ಬೇಸಿನ್‌ನಲ್ಲಿ ಹರಿವ ನೀರಿನ ಸದ್ದು, ಹೆಲಿಕಾಪ್ಟರ್ ಅತ್ತಿಂದಿತ್ತ ಹಾರುವ ಸದ್ದು, ಗಾಜಿನ ಮೇಲೆ ಹೆಜ್ಜೆ ಇಟ್ಟ ಯೋಧನ ಪಿಸುಮಾತು, – ಎಲ್ಲವೂ ಸಹಜವಾಗಿರುತ್ತೆ. ಇಂಥ ಚಿತ್ರಗಳಲ್ಲಿ ಪಾತ್ರಗಳು ಯಾವುದಾದರೂ ಕೆಲಸ ಮಾಡುತ್ತಲೇ ಘಟನೆಗಳಲ್ಲಿ ಭಾಗಿಯಾಗುತ್ತವೆ. ಎಷ್ಟು ಬೇಕೋ ಅಷ್ಟು, ಎಲ್ಲಿ ಬೇಕೋ ಅಲ್ಲಿ ಮಾತ್ರ ಸಂಗೀತ ನವಿರಾಗಿ ಹಾಯುತ್ತದೆ. ಈ ಸಿನೆಮಾಗಳಲ್ಲಿ ಪಾತ್ರಗಳು ಬಾತ್‌ರೂಮಿಗೆ, ಟಾಯ್ಲೆಟ್ಟಿಗೆ ಹೋಗುವುದೂ ಕಾಣುತ್ತದೆ! ಎಲ್ಲ ಸನ್ನಿವೇಶಗಳೂ ನೈಜವಾಗಿರುತ್ತವೆ. ಕಚೇರಿ ಎಂದರೆ ಅಪ್ಪಟ ಕಚೇರಿಯೇ. ಅಲ್ಲಿ ನೂರಾರು ಜನ ಕೆಲಸ ಮಾಡುವುದನ್ನು ಕಾಣಬಹುದು. ಟೈಟಾನಿಕ್ ಹಡಗು ಮುಳುಗುವಾಗ ಸಾವಿರಾರು ಜನ ಒದ್ದಾಡುವುದನ್ನು ಕಾಣಬಹುದು (ಆಫ್‌ಕೋರ್ಸ್, ಇಲ್ಲಿ ಕಂಪ್ಯೂಟರ್ ಚಿತ್ರಣವೂ ಇದೆ ಅನ್ನಿ). ಯುದ್ಧದ ದೃಶ್ಯಗಳಲ್ಲಿ ಇಡೀ ವಾತಾವರಣವೇ ಹೊಗೆ, ಮದ್ದುಗುಂಡುಗಳ ಆರ್ಭಟದಿಂದ ತುಂಬಿಹೋಗುತ್ತದೆ. ದೂರದ ಶಬ್ದ ದೂರದಿಂದಲೂ, ಹತ್ತಿರದ ಸದ್ದು ಹತ್ತಿರದಿಂದಲೂ ಕೇಳಿಸುತ್ತೆ. ಬಟ್ಟೆ ಬಿಚ್ಚಲೇಬೇಕೆಂದಿದ್ದರೆ ಮುಖ್ಯ ಪಾತ್ರಗಳೂ ಯಾವ ಸಂಕೋಚವೂ ಇಲ್ಲದೆ ಬಟ್ಟೆ ಬಿಚ್ಚುತ್ತವೆ; ಶೆರ್ಲಾಕ್ ಹೋಮ್ಸ್ ಸಿನೆಮಾದಲ್ಲಿ ಕಾಲದ ಜಟಕಾಬಂಡಿಯಿಂದ ಹಿಡಿದು ಎಲ್ಲವೂ ಅದೇ ಕಾಲದ ದೃಶ್ಯಗಳನ್ನು ರಸವತ್ತಾಗಿ, ಅಚ್ಚುಕಟ್ಟಾಗಿ ಮೂಡಿಸಿದ್ದಾರೆ. ಭಾಷೆಯನ್ನೂ ಸೇರಿಸಿಕೊಂಡು…!
ಹೀಗೆ ಕಥೆಯನ್ನು ಅದರ ಕಾಲಕ್ಕೆ ಮತ್ತು ಸಂದರ್ಭಕ್ಕೆ ತಕ್ಕಂತೆ ನೈಜವಾಗಿ ಹೆಣೆಯುವ ಕಲೆ ಹಾಲಿವುಡ್ ಸಿನೆಮಾಗಳ ನಿರ್ಮಾಪಕರಿಗೆ ಬಹುತೇಕ ಸಿದ್ಧಿಸಿದೆ. ಹಾಲಿವುಡ್‌ನ ಚಿತ್ರೀಕರಣದ ಸೆಟ್‌ಗಳಿಗೇ ಭಾರೀ ಖರ್ಚಾಗುತ್ತದೆ. ನೈಜತೆಯನ್ನು ತರುವ ಈ ಯತ್ನಕ್ಕೇ ಲಕ್ಷಗಟ್ಟಳೆ ಡಾಲರ್ ಖರ್ಚಾಗುತ್ತದೆ. ಇಂಥ ಸೆಟ್‌ಗಳ ಖರ್ಚನ್ನು ವಸೂಲಿ ಮಾಡಲೆಂದೇ ಒಂದೇ ಸಿನೆಮಾದ ಎರಡು, ಮೂರು, ನಾಲ್ಕನೇ ಕಂತುಗಳು ಬರುತ್ತವೆ! ಒಂದೇ ಸಿನೆಮಾಗೆ ಹಾಕಿದ ಸೆಟ್‌ನಿಂದ ಆರಾಮಾಗಿ ಮೂರು ಸಿನೆಮಾ ಮಾಡುತ್ತಾರೆ. ಅದಕ್ಕೇ ಶೆರ್ಲಾಕ್ ಹೋಮ್ಸ್ ಸಿನೆಮಾದಲ್ಲಿ ಕಥೆ ಈಗಷ್ಟೇ ಆರಂಭವಾಗಿದೆ.
ಹಾಲಿವುಡ್ ಸಿನೆಮಾಗಳ ಇನ್ನೊಂದು ವಿಶೇಷವೆಂದರೆ ಸಸ್ಪೆನ್ಸ್. ಇದು ಎಲ್ಲ ಬಗೆಯ ಸಿನೆಮಾಗಳಲ್ಲೂ ಸಾಮಾನ್ಯ. ಕೊಲೆಗಾರ ಯಾರು ಎಂದು ನೀವು ತಲೆ ಚಚ್ಚಿಕೊಳ್ಳುವ ಹೊತ್ತಿಗೆ ಯಾವುದೋ ವಿಚಿತ್ರ ತಿರುವು ಬಂದಿರುತ್ತದೆ. ಒಳ್ಳೆಯವರು ಕೆಟ್ಟವರಾಗೂ, ಕೆಟ್ಟವರೇ ಪ್ರೀತಿ ತೋರಿಸುವ ಪಾತ್ರಗಳಾಗೂ ಕಾಣಿಸಿಕೊಳ್ಳುವ ವೈಚಿತ್ರ್ಯವೂ ಇದೆ. ಸೈಲೆನ್ಸ್ ಆಫ್ ದಿ ಲ್ಯಾಂಬ್ಸ್ ಸರಣಿಯ ಹ್ಯಾನಿಬಾಲ್‌ನಲ್ಲಿ ಖಳನಾಯಕ ಆಂಥೋನಿ ಹಾಪ್‌ಕಿನ್ಸ್ ತನ್ನ ಪ್ರೀತಿಯ ಅಧಿಕಾರಿಗಾಗಿ ತನ್ನದೇ ಕೈ ಕತ್ತರಿಸಿಕೊಳ್ಳುವುದು ಒಂದು ಉದಾಹರಣೆ. ನ್ಯಾಶನಲ್ ಟ್ರೆಜರ್(೨)ನಲ್ಲಿ ಖಳನಾಯಕ ಜೀವ ತೆರುವುದೂ ಇಂಥದ್ದೇ ಇನ್ನೊಂದು ಘಟನೆ. ಅಥವಾ ಸಿನೆಮಾ ಯಾವುದೇ ಖಚಿತ ಕೊನೆಯನ್ನೂ ಕಾಣದೆ ನಿಮ್ಮನ್ನು ಗೊಂದಲಕ್ಕೆ ತಳ್ಳಬಹುದು. ಇಂಥ ನೂರಾರು ಸಿನೆಮಾಗಳಿವೆ. ಅಂತಿಮ ನಿರ್ಣಯವನ್ನು ನೀವೇ ಮಾಡಿಕೋಬೇಕು; ನಿಮ್ಮ ತರ್ಕಕ್ಕೆ ತಕ್ಕಂತೆ! ಕೆಲವೊಮ್ಮೆ ಇಂಥ ಚಿತ್ರಗಳ ಎಂಡ್ ಕುರಿತ ಚರ್ಚೆಗೆ ಕೊನೆಯೇ ಇರುವುದಿಲ್ಲ. ಇಂಥ ಓಪನ್ ಎಂಡೆಡ್ ಸಿನೆಮಾಗಳೂ ವೀಕ್ಷಕರನ್ನು ಚಿಂತನೆಗೆ ಹಚ್ಚುತ್ತವೆ.
ಹಾಲಿವುಡ್ ಸಿನೆಮಾಗಳಲ್ಲಿ ಕಾಲದ ಲೆಕ್ಕಾಚಾರವೂ ಕರಾರುವಾಕ್. ಒಂದು ಸಿನೆಮಾದ ಕಥೆ ನಡೆಯುವ ಹೊತ್ತು-ಗೊತ್ತು ಎಲ್ಲವೂ ಇಲ್ಲಿ ಖಚಿತ. ಒಂದು ಕಥೆ ಕೆಲವೇ ಗಂಟೆಗಳಲ್ಲಿ ನಡೆಯಬಹುದು, ಅಥವಾ ಕೆಲವು ದಿನಗಳಲ್ಲಿ ; ಅಥವಾ ಕೆಲವು ವರ್ಷಗಳಲ್ಲಿ…. ಹಾಲಿವುಡ್ ಸಿನೆಮಾದಲ್ಲಿ ಇವೆಲ್ಲವೂ ಪಕ್ಕಾ ನಿರ್ಧಾರಿತ. ಆದ್ದರಿಂದ ಹಾಲಿವುಡ್ ಸಿನೆಮಾದ ಕಥೆ ಎಲ್ಲಿ, ಯಾವಾಗ, ಯಾರಿಂದ, ಯಾಕೆ ಮತ್ತು ಹೇಗೆ ನಡೆಯಿತು – ಪತ್ರಿಕೋದ್ಯಮದ ಸೂತ್ರದ ಅಳವಡಿಕೆ ಆಗಿರುತ್ತದೆ. ಆದ್ದರಿಂದ ತಾಳ – ತಂತಿ ಇರುವ ಇಂಥ ಚಿತ್ರಗಳನ್ನು ನೋಡಿದಾಗ ವಾಸ್ತವಕ್ಕೆ ಸಂಬಂಧ ಕಲ್ಪಿಸಿಕೊಳ್ಳುವುದು, ಸಿನೆಮಾವನ್ನು ಪೊಜಿಶನ್ ಮಾಡಿಕೊಳ್ಳುವುದು ಸಲೀಸು.
ನಾನು ನೋಡಿದ ಇತ್ತೀಚೆಗಿನ ಸಿನೆಮಾ `ದಿ ಹರ್ಟ್ ಲಾಕರ್’ನ ಕೊನೆಯ ದೃಶ್ಯವಿನ್ನೂ ನನ್ನೊಳಗೇ ಕೊರೆಯುತ್ತಿದೆ. ಹಲವಾರು ಬೀಗಗಳಿರುವ ಬಾಂಬುಗಳನ್ನು ಹೊತ್ತ ಅಮಾಯಕನೊಬ್ಬ ಅಮೆರಿಕಾ ಯೋಧರ ಬಳಿಗೆ ಬರುತ್ತಾನೆ. ಎರಡೇ ನಿಮಿಷಗಳಲ್ಲಿ ಬಾಂಬ್ ನಿಷ್ಕ್ರಿಯ ಮಾಡಲಾಗದ ತಜ್ಞ ‘ಕ್ಷಮಿಸು, ನಾನೇನೂ ಮಾಡಲಾರೆ’ ಎಂದು ಓಡುತ್ತಾನೆ. ‘ಯಾ ಅಲ್ಲಾ’ ಎನ್ನುತ್ತ ಆ ಮುಗ್ಧ ಜೀವ ನಿಮ್ಮ ಕಣ್ಣೆದುರೇ ಸ್ಫೋಟವಾಗುತ್ತದೆ. ಎಷ್ಟೋ ನೂರು ಬಾಂಬುಗಳನ್ನು ನಿಷ್ಕ್ರಿಯಗೊಳಿಸಿದ ಆ ಯೋಧ ಅದಾಗಲೇ ನಿಮ್ಮೆದುರೇ ಎಂಥೆಂಥ ಕ್ಲಿಷ್ಟ ಬಾಂಬ್‌ಗಳನ್ನೂ ನಿಷ್ಕ್ರಿಯಗೊಳಿಸಿದ್ದನ್ನು ನೀವು ಕೆಲವು ನಿಮಿಷಗಳ ಹಿಂದಷ್ಟೇ ನೋಡಿರುತ್ತೀರಿ. ಆದರೆ ಈ ಅಮಾಯಕನ ಜೀವ ಉಳಿಯುವುದೇ ಇಲ್ಲ.
ಇಂಥ ಒಂದು ದೃಶ್ಯ – ಅದೆಷ್ಟೇ ಭಯಾನಕವಾಗಿದ್ದರೂ – ನಿಮ್ಮನ್ನು ಕಲಕುತ್ತಲ್ಲ…… ಅದೇ ಹಾಲಿವುಡ್‌ನ ಅಗ್ಗಳಿಕೆ. ಎರಡು ತಾಸುಗಳ ಸಿನೆಮಾ ಹೀಗೆ ಒಂದೇ ಕ್ಷಣದಲ್ಲಿ ನಿಮ್ಮ ನಂಬಿಕೆಗಳನ್ನು ಪ್ರಶ್ನಿಸಿ, ಅಲುಗಾಡಿಸಿ, ನರಳಿಸಿಬಿಡುತ್ತಲ್ಲ….. ಅದೇ ಹಾಲಿವುಡ್ ಸಿನೆಮಾದ ಸಾಮರ್ಥ್ಯ.
ಅದಕ್ಕೇ ನಾನು ಹಾಲಿವುಡ್ ಸಿನೆಮಾದ ವ್ಯಸನಿ! ನಿಮಗೂ ಇದೋ ಸ್ವಾಗತ !
(ಸಾಂಗತ್ಯ ಮೊದಲ ಸಂಚಿಕೆಯಲ್ಲಿ ಪ್ರಕಟಿತ)
